Б.Мядагбадам: Анх хорин мянган төгрөгөөр бизнесээ эхэлж байлаа

Тэртээ 2000 оноос Үндэсний хувцас оёж Нарантуул худалдааны төвд бизнесийн гараагаа эхэлж өдийг хүртэл өөрийн цехтэй болтлоо өргөжсөн жирийн нэг Монгол эмэгтэй Мядагбадамтай ярилцсан юм.

Танд  Монгол хувцас оёх арга ухааныг хэн анх зааж өгсөн бэ?

- Миний Монгол хувцас оёх ухааныг миний ээж анх зааж өгсөн. Би ээждээ Монгол дээл өмсөхгүй гэж хэлж байсан хүн дээ. Надад дээл оёхыг зааж  өгөөд бурхны оронд одсон доо. Нарантуул худалдааны төвдөө би маш их хайртай.Энэ газраас  олон мянган хүн амьдралаа залгуулж байгаа юм.

-Та анхны бизнесийн гараагаа яаж эхэлж байв?

Би 1998-2000 он хүртэл Улаан-Үүд, Эрхүү, Манжуурт ганзагын наймаа хийж байсан.  Миний дүү надад  үндэсний хувцас оёх саналыг анх тавьж байсан.   Анх хорин мянган төгрөгөөр бизнесээ эхэлж байлаа.  Үндэснийхээ хувцсыг оёх дуртай шүү.

Өдийг хүртэл явахад хэцүү бэрх, шантрах зүйл их гарч байсан байх.Тэр бүхнийг яаж даван туулж байв?

Тийм үе их байсан.. Манайх жилийн дөрвөн улирал цасан шуурга, хаврын хавсарга, усан бороо орсон ч наймаагаа хийж л байдаг юм. Шантрах явдал их л гарч байлаа. Тэр бүгдийг даван туулж өдийг хүрлээ дээ.

Танай цех хэдэн ажилчинтай вэ?

35-40 насны зургаан ажилчинтай .2010 оноос цехийн ажилчидтай болсон.  Шижигнэсэн сайхан залуучууд бий. 

-Таныг наймаагаа анх эхэлж байхад Монгол үндэсний хувцсыг хүмүүс их авдаг байсан уу?

- Төдийлөн одооных шиг их сонирхдоггүй байсан. Зөвхөн хөдөөнийхөн, настайвтар хүмүүс авдаг байсан. Одооных шиг залуу хүүхдүүд ингэж авдаггүй байсан. Сүүлийн долоо, найман жил аягүй эрчтэй үндэсний хувцсаа өмсөж байна. Цагаан сараар заавал  ахмад настан гэлтгүй хүүхэд, залуучууд  үндэснийхээ хувцсаар гоёж байгаа нь их бахархууштай санагддаг юм.

Сүүлийн үед олон нийтийн мэдээллийн хэрэгслээр Нарантуул захыг хотоос гаргая гэсэн асуудал их яригдаж байгаа. Та энэ тал дээр ямар байр суурьтай байдаг вэ?

 Нарантуул захыг хотоос гарчихвал яана  даа гэж боддог. Энэ асуудлыг зөө талаас нь шийдэж өгөх  өгөх хэрэгтэй. Ард түмний амьдрал хэцүү байгаа шүү дээ.

-Шинээр бизнес хийж эхлэх гэж байгаа залуу хүмүүст юу гэж захимаар байна

 Хөнгөн наймаа хийгээд ихийг олно гэж бодож болохгүй. Аливаа юмыг багаас нь эхлэх хэрэгтэй. Хуримтлал бий болгох хэрэгтэй. Зуун мянган төгрөгний дээл зарсан бол хэдэн төгрөгөөр нь материал авч ажилчидтай цалин өгөх вэ гэдгийг сайн тооцоолох хэрэгтэй. Бага гэлтгүй хуримтлал үүсгэх хэрэгтэй.

Таны цаашдын зорилго юу вэ?

 Энэ бизнесээ өргөжүүлээд дээлэнд орж байгаа наалт хатгамал гээд туслах материалын бизнес эрхэлж үздэг юм уу гэж бодож байгаа. Амарсан үедээ өөрөө хийгээд өвгөндөө зааж өгөөд зогсоодог юм уу гэж бодож байгаа.

Ярилцсанд баярлалаа.

 

ЭНЭ МЭДЭЭНД ӨГӨХ ТАНЫ ХАРИУЛАЛ?

2
15
1
5
close